សៀមរាប៖ អាជ្ញាធរជាតិអប្សរាបានយកបំណែកភ្លុកដំរីមួយដែលបានកំណាយរកឃើញ មកតភ្ជាប់ទៅនឹងក្បាលដំរីកណ្តាលរបស់ដំរីក្បាលបីនៅជ្រុងអាគ្នេយ៍នៃខ្លោងទ្វារតាកាវនៃក្រុងអង្គរធំ។

មន្ត្រីបច្ចេកទេសជួសជុលនិងអភិរក្សថ្ម លោក មុំ សុផុន បានលើកឡើងថា កន្លងមកក្រុមការងារបានកំណាយសម្អាតកំណកដីជុំវិញខ្លោងទ្វារតាកាវ រួចក៏ប្រទះឃើញបំណែកភ្លុកដំរីចំនួន២ ហើយក្នុងចំណោមភ្លុកដំរីចំនួន២នោះគឺមានតែភ្លុកចំនួន ១ប៉ុណ្ណោះដែលមានរូបរាងពេញលេញ និងរកឃើញទីតាំងដើម គឺនៅក្បាលដំរីកណ្តាលផ្នែកខាងស្តាំនៃជ្រុងអាគ្នេយ៍របស់ខ្លោងទ្វារ។ ភ្លុកដំរីមួយទៀត មិនមានរូបរាងពេញលេញ ដែលមិនអាចកំណត់ថានៅទីតាំងនៃក្បាលដំរីណាមួយឡើយក្នុងចំណោមដំរីទាំង៣។

មន្ត្រីបច្ចេកទេសរូបនេះ បានប្រាប់ឱ្យដឹងថា ការតភ្ជាប់បំណែកភ្លុកដំរីទៅនឹងក្បាលដំរី គឺដើម្បីបង្ហាញរូបរាងពេញលេញរបស់ដំរីដែលដូនតាខ្មែរបានធ្លាក់ ឱ្យភ្ញៀវទេសចរជាតិ- អន្តរជាតិ បានឃើញ។ លោកថ្លែងថា៖ «នេះជាការល្អណាស់ដែលភ្លុកដំរីដែលបានបាក់កប់ទៅក្នុងដីជាយូរឆ្នាំមកហើយ ត្រូវបានរកឃើញមកវិញ»។

លោកបានអំពាវនាវឱ្យសាធារណជនអញ្ជើញមកទស្សនាឈ្វេងយល់ពីចម្លាក់ដំរីក្បាលបី នៅខ្លោងទ្វារតាកាវជ្រុងអាគ្នេយ៍ ព្រោះចម្លាក់ដំរីក្បាលបីដែលមានភ្លុកពេញលេញ កម្រឃើញមាននៅសេសសល់តាមខ្លោងទ្វារចេញចូលក្រុងអង្គរធំទាំង៥។

ខ្លោងទ្វារតាកាវ គឺជាខ្លោងទ្វារមួយក្នុងចំណោមខ្លោងទ្វារចេញចូលទាំង៥ នៃក្រុងអង្គរធំ ដែលស្ថិតនៅទិសខាងលិច នៃប្រាសាទបាយ័ន។ ក្រោយពីបញ្ចប់ការជួសជុលទាំងស្រុង ខ្លោងទ្វារនេះ នឹងបង្កើនភាពទាក់ទាញភ្ញៀវទេសចរជាតិ និងអន្តរជាតិឱ្យទៅទស្សនា និងផ្តិតយករូបភាពមួយផ្នែកទៀតនៃទិសដៅទេសចរណ៍ថ្មី៕